Tryeza të Rrumbullakëta

Tryezë e Rrumbullakët - 29 Prill 2025

Më datë 29.04.2025 u organizua në Fakultetin e Ekonomisë Tryeza e Rrumbullakët me pjesëmarrjen e përfaqësuesve të organizatave të shoqërisë civile. Aktiviteti u zhvillua në kuadër të projektit: “Përshtatja e Kurrikulave të Ekonomiksit të Mjedisit në kuadër të Kontekstit të BE-së”, i cili realizohet në kuadër të Programeve Jean Monnet (ERASMUS Jean Monnet LS Type I and II) me mbështetjen e Bashkimit Evropian. Pjesë e këtij aktivitetin ishin 28 studentë krahas pjesëmarrësve të tjerë që përfaqësonin grupe të ndryshme interesi, si, pedagogë, kërkues dhe ekspertë mjedisi, duke krijuar një hapësirë bashkëpunuese ku u shkëmbyen ide dhe përvoja mbi sfidat mjedisore.

Gjatë sesionit, dy studente të lëndës “Ekonomiksi i Mjedisit”, Erla Sala dhe Dea Gjerkaj, prezantuan punimin e tyre me temë “Ndryshimet klimatike dhe pasojat ekonomiko-sociale të tyre”. Prezantimi u përqendrua në ndikimet afatgjata të ndryshimeve klimatike mbi ekonominë dhe shoqërinë, si dhe në nevojën për politika të qëndrueshme për t’u përballur me këto sfida.

Një moment i veçantë i aktivitetit ishte prezantimi nga Z. Olsi Nika, përfaqësues i EcoAlbania dhe fitues i Çmimit Goldman për Mjedisin. Ai mbajti një fjalë me temë “Mbrojtja e Lumit Vjosë”, ku foli për rëndësinë e ruajtjes së lumenjve të egër dhe, në veçanti, të lumit të Vjosës. Z. Nika ndau përvojën e fushatave ndërkombëtare që çuan në shpalljen e kësaj zone si Park Kombëtar, duke theksuar rëndësinë e bashkëpunimit midis institucioneve, organizatave të shoqërisë civile dhe komunitetit lokal.

Studentët patën mundësi të angazhoheshin në diskutime interaktive me pjesëmarrësit e tjerë, duke paraqitur ide për investime të mundshme që do të sillnin përfitime jo vetëm ekonomike, por edhe mjedisore. Ata theksuan se pjesëmarrja në këtë tryezë ishte një përvojë e vlefshme për rritjen e ndërgjegjësimit dhe zhvillimin e aftësive profesionale në lidhje me çështjet mjedisore dhe potencialin e rigjelbërimit.

Kjo tryezë e rrumbullakët shërbeu si një platformë e rëndësishme për shkëmbim idesh, rritje kapacitetesh dhe ndërgjegjësim publik, duke përforcuar rolin e të rinjve si aktorë të rëndësishëm në nxitjen e zgjidhjeve të qëndrueshme për mjedisin.

Tryezë e Rrumbullakët - 25 Prill 2024

Fakulteti i Ekonomisë organizoi më datë 25.04.2024 aktivitetin që bëri bashkë studentët, stafin akademikë dhë përfaqëues të biznesit. Të ftuar në aktivitet ishin përfaqësuesit e kompanisë Gjonaj Group Holdings, të cilët ndanë me studentët eksperiencën e tyre në fushën e investimeve në instrumentet financiare. 

Aktiviteti u zhvillua në kuadër të projektit: "Përshtatja e Kurrikulave të Ekonomiksit të Mjedisit në kuadër të Kontekstit të BE-së", i cili realizohet në kuadër të Programit Erasmus+ (ERASMUS Jean Monnet LS Type I and II) me mbështetjen e Bashkimit Evropian.